ਜਲੰਧਰ ਤੋਂ ਨੇਪਾਲ ਜਾ ਰਹੀ ਬੱਸ ਡਿਵਾਈਡਰ ਨਾਲ ਟਕਰਾ ਕੇ ਪਲਟੀ, 15 ਲੋਕ ਹੋਏ ਜ਼ਖ਼ਮੀ

ਸ਼ਾਹਜਹਾਂਪੁਰ-ਪੀਲੀਭੀਤ ਰਾਸ਼ਟਰੀ ਰਾਜਮਾਰਗ 'ਤੇ ਬੁੱਧਵਾਰ ਸਵੇਰੇ ਜਲੰਧਰ ਤੋਂ ਨੇਪਾਲ ਜਾ ਰਹੀ ਇਕ ਟੂਰਿਸਟ ਬੱਸ ਤੂੜੀ ਨਾਲ ਭਰੇ ਟਰੱਕ ਨੂੰ ਬਚਾਉਣ ਦੀ ਕੋਸ਼ਿਸ਼ ਦੌਰਾਨ ਡਿਵਾਈਡਰ ਨਾਲ ਟਕਰਾ ਕੇ ਪਲਟ ਗਈ।

ਬੱਸ 'ਚ ਸਵਾਰ 15 ਲੋਕ ਜ਼ਖਮੀ ਹੋ ਗਏ। ਗੰਭੀਰ ਜ਼ਖਮੀਆਂ ਦਾ ਇਲਾਜ ਸਰਕਾਰੀ ਮੈਡੀਕਲ ਕਾਲਜ 'ਚ ਚੱਲ ਰਿਹਾ ਹੈ ਜਦਕਿ ਬਾਕੀਆਂ ਨੂੰ ਕਮਿਊਨਿਟੀ ਹੈਲਥ ਸੈਂਟਰ 'ਚ ਦਾਖਲ ਕਰਵਾਇਆ ਗਿਆ ਹੈ।

52 ਲੋਕ ਪੰਜਾਬ ਦੇ ਜਲੰਧਰ ਤੋਂ ਨੇਪਾਲ ਦੇ ਵੱਖ-ਵੱਖ ਇਲਾਕਿਆਂ 'ਚ ਜਾਣ ਲਈ ਟੂਰਿਸਟ ਬੱਸ 'ਚ ਸਵਾਰ ਹੋਏ ਸਨ। ਬੁੱਧਵਾਰ ਸਵੇਰੇ ਕਰੀਬ 3.30 ਵਜੇ ਨਿਗੋਹੀ ਬਲਾਕ ਦਫਤਰ ਨੇੜੇ ਸਾਹਮਣਿਓਂ ਆ ਰਹੇ ਤੂੜੀ ਨਾਲ ਭਰੇ ਟਰੱਕ ਨੂੰ ਬਚਾਉਣ ਲਈ ਬੱਸ ਬੇਕਾਬੂ ਹੋ ਕੇ ਡਿਵਾਈਡਰ ਨਾਲ ਟਕਰਾ ਕੇ ਪਲਟ ਗਈ।

ਬੱਸ ਵਿਚ ਸਵਾਰ ਚੰਡੀਗੜ੍ਹ ਵਾਸੀ ਲਕਸ਼ਮੀ ਥਾਪਾ, ਅਰਵਨ, ਰੰਤੂ, ਰਵੀ ਸ਼ਾਹ, ਸੀਤਾ ਪੰਡਿਆਲ, ਪੰਜਾਬ ਨਿਵਾਸੀ ਸਪਨਾ ਗੌਤਮ, ਬਸੰਤ, ਲੀ ਨਾਵਾ, ਨੇਪਾਲ ਦੇ ਲੁੰਬਿਨੀ ਨਿਵਾਸੀ ਰੰਤੂ, ਬਾਗਮਤੀ ਨੇਪਾਲ ਨਿਵਾਸੀ ਕ੍ਰਿਸ਼ਨਾ, ਸਮਰਾਟ, ਨੇਪਾਲ ਦੇ ਕ੍ਰਿਸ਼ਨਾਗਰ ਨਿਵਾਸੀ ਸੋਨੂੰ, ਹਰਿਦੇਵ ਸ਼ਰਮਾ, ਪਵਿੱਤਰ, ਸ਼ਿਖਾ, ਰਾਮਬਹਾਦੁਰ ਆਦਿ ਜ਼ਖ਼ਮੀ ਹੋ ਗਏ।

ਭਾਜਪਾ ਵਿਧਾਇਕ ਸਲੋਨਾ ਕੁਸ਼ਵਾਹਾ ਵੀ ਵਰ੍ਹਦੇ ਮੀਂਹ 'ਚ ਮੌਕੇ 'ਤੇ ਪਹੁੰਚ ਗਈ। ਉਨ੍ਹਾਂ ਨੇ ਗੰਭੀਰ ਜ਼ਖ਼ਮੀਆਂ ਨੂੰ ਸਰਕਾਰੀ ਮੈਡੀਕਲ ਕਾਲਜ ਭੇਜ ਦਿੱਤਾ ਜਦਕਿ ਬਾਕੀਆਂ ਨੇ ਕਮਿਊਨਿਟੀ ਹੈਲਥ ਸੈਂਟਰ ਵਿਖੇ ਹੀ ਇਲਾਜ ਸ਼ੁਰੂ ਕਰ ਦਿੱਤਾ।

ਹਾਦਸੇ ਤੋਂ ਬਾਅਦ ਸ਼ਾਹਜਹਾਂਪੁਰ-ਪੀਲੀਭੀਤ ਸੜਕ ਕਾਫੀ ਦੇਰ ਤੱਕ ਜਾਮ ਰਹੀ। ਇੰਚਾਰਜ ਇੰਸਪੈਕਟਰ ਰਾਜੇਸ਼ ਸਿੰਘ ਨੇ ਦੱਸਿਆ ਕਿ ਸਾਰੇ ਜ਼ਖਮੀਆਂ ਦੀ ਹਾਲਤ ਠੀਕ ਹੈ।