ਜਿੱਤ ਦਾ 'ਚੌਕਾ' ਲਾਉਣਾ ਚਾਹੇਗੀ ਰੋਹਿਤ ਬ੍ਰਿਗੇਡ, ਇਨ੍ਹਾਂ 11 ਖਿਡਾਰੀਆਂ ਨੂੰ ਅਜ਼ਮਾ ਸਕਦੀ ਹੈ ਬੰਗਲਾਦੇਸ਼ ਖ਼ਿਲਾਫ਼

ਵਿਸ਼ਵ ਕੱਪ 'ਚ ਆਪਣੇ ਪਹਿਲੇ ਤਿੰਨ ਮੈਚਾਂ 'ਚ ਆਸਟ੍ਰੇਲੀਆ, ਅਫਗਾਨਿਸਤਾਨ ਅਤੇ ਪਾਕਿਸਤਾਨ ਨੂੰ ਹਰਾਉਣ ਵਾਲੀ ਟੀਮ ਇੰਡੀਆ ਇਸ ਸਮੇਂ ਸਭ ਤੋਂ ਬਿਹਤਰ ਨਜ਼ਰ ਆ ਰਹੀ ਹੈ। ਟੀਮ ਪ੍ਰਬੰਧਨ ਪਲੇਇੰਗ ਇਲੈਵਨ ਨੂੰ ਲੈ ਕੇ ਇਕਦਮ ਸਪੱਸ਼ਟ ਹੈ ਅਤੇ ਇਸੇ ਲਈ ਬੰਗਲਾਦੇਸ਼ ਖਿਲਾਫ ਹੋਣ ਵਾਲੇ ਮੈਚ 'ਚ ਵੀ ਟੀਮ 'ਚ ਬਦਲਾਅ ਦੀ ਬਹੁਤ ਘੱਟ ਗੁੰਜਾਇਸ਼ ਹੈ।

ਹਾਲਾਂਕਿ ਟੂਰਨਾਮੈਂਟ ਅਜੇ ਲੰਮਾ ਹੈ ਅਤੇ ਬੈਂਚ 'ਤੇ ਬੈਠੇ ਖਿਡਾਰੀਆਂ ਨੂੰ ਮੌਕਾ ਮਿਲ ਸਕਦਾ ਹੈ। 2019 ਵਿਸ਼ਵ ਕੱਪ ਦੇ ਹਰ ਮੈਚ ਵਿਚ ਅਸੀਂ ਪਲੇਇੰਗ ਇਲੈਵਨ 'ਚ ਬਹੁਤ ਸਾਰੇ ਬਦਲਾਅ ਦੇਖੇ ਪਰ ਇਸ ਵਾਰ ਮੁੱਖ ਕੋਚ ਰਾਹੁਲ ਦ੍ਰਾਵਿੜ ਆਖਰੀ 11 ਖਿਡਾਰੀਆਂ ਦੀ ਭੂਮਿਕਾ ਨੂੰ ਲੈ ਕੇ ਭਰੋਸੇਮੰਦ ਹਨ।

ਇਹੀ ਕਾਰਨ ਹੈ ਕਿ ਵਿਸ਼ਵ ਕੱਪ ਤੋਂ ਠੀਕ ਪਹਿਲਾਂ ਆਸਟਰੇਲੀਆ ਖਿਲਾਫ ਪੰਜ ਵਿਕਟਾਂ ਲੈਣ ਵਾਲੇ ਮੁਹੰਮਦ ਸ਼ਮੀ ਨੂੰ ਹੁਣ ਤੱਕ ਮੌਕਾ ਨਹੀਂ ਮਿਲਿਆ ਹੈ। ਜਸਪ੍ਰੀਤ ਬੁਮਰਾਹ ਅਤੇ ਮੁਹੰਮਦ ਸਿਰਾਜ ਨਵੀਂ ਗੇਂਦ ਨਾਲ ਪ੍ਰਭਾਵਸ਼ਾਲੀ ਰਹੇ ਹਨ, ਜਦੋਂਕਿ ਤੀਜੇ ਗੇਂਦਬਾਜ਼ ਵਜੋਂ ਹਾਰਦਿਕ ਦੀ ਭੂਮਿਕਾ ਤੈਅ ਹੈ।

ਸ਼ਾਰਦੁਲ, ਸ਼ਮੀ ਜਾਂ ਅਸ਼ਵਿਨ ਕਿਸ ਨੂੰ ਮਿਲੇਗੀ ਜਗ੍ਹਾ?

ਸਪਾਟ ਪਿੱਚਾਂ 'ਤੇ ਸ਼ਾਰਦੁਲ ਠਾਕੁਰ ਨੂੰ ਬੱਲੇਬਾਜ਼ੀ ਆਲਰਾਊਂਡਰ ਦੇ ਤੌਰ 'ਤੇ ਮੈਦਾਨ 'ਚ ਉਤਾਰਿਆ ਜਾ ਰਿਹਾ ਹੈ, ਜਦੋਂਕਿ ਜੇ ਪਿੱਚ ਸਪਿੱਨਰਾਂ ਲਈ ਮਦਦਗਾਰ ਹੈ ਤਾਂ ਦ੍ਰਾਵਿੜ ਰਵਿੰਦਰ ਜਡੇਜਾ ਅਤੇ ਕੁਲਦੀਪ ਯਾਦਵ ਦੇ ਨਾਲ ਅਸ਼ਵਿਨ ਨੂੰ ਮੌਕਾ ਦੇ ਰਹੇ ਹਨ। ਬੱਲੇਬਾਜ਼ੀ ਦੀ ਗੱਲ ਕਰੀਏ ਤਾਂ 2019 ਵਿੱਚ ਟੀਮ ਵੱਲੋਂ ਕੀਤੇ ਗਏ ਤਜ਼ਰਬਿਆਂ ਦੀ ਗਿਣਤੀ ਇਸ ਵਾਰ ਨਹੀਂ ਹੈ। ਸ਼੍ਰੇਅਸ ਚੌਥੇ ਨੰਬਰ 'ਤੇ ਫਿੱਟ ਹੈ। ਇਹੀ ਕਾਰਨ ਹੈ ਕਿ ਸੂਰਿਆਕੁਮਾਰ ਯਾਦਵ ਨੂੰ ਬੈਂਚ 'ਤੇ ਬੈਠਣਾ ਪਿਆ ਹੈ। ਵਿਸ਼ਵ ਕੱਪ ਤੋਂ ਪਹਿਲਾਂ ਸੂਰਿਆ ਨੂੰ ਐਕਸ ਫੈਕਟਰ ਮੰਨਿਆ ਜਾਂਦਾ ਸੀ। ਕਪਤਾਨ ਰੋਹਿਤ ਸ਼ਰਮਾ ਅਗਵਾਈ ਕਰ ਰਹੇ ਹਨ ਅਤੇ ਇਸ ਸਮੇਂ ਭਾਰਤੀ ਟੀਮ ਨੂੰ ਹਰਾਉਣਾ ਕਾਫੀ ਮੁਸ਼ਕਲ ਨਜ਼ਰ ਆ ਰਿਹਾ ਹੈ।

ਕੁਝ ਸਵਾਲ ਅਜਿਹੇ ਹਨ ਜਿਨ੍ਹਾਂ ਦੇ ਜਵਾਬ ਟੀਮ ਪ੍ਰਬੰਧਨ ਨੂੰ ਲੱਭਣੇ ਹੋਣਗੇ। ਜਿਵੇਂ ਟੀਮ ਹਾਰਦਿਕ 'ਤੇ ਤੀਜੇ ਤੇਜ਼ ਗੇਂਦਬਾਜ਼ ਦੇ ਤੌਰ 'ਤੇ ਭਰੋਸਾ ਕਰ ਸਕਦੀ ਹੈ। ਠਾਕੁਰ ਦੀ ਥਾਂ ਸ਼ਮੀ ਨੂੰ ਨਹੀਂ ਲੈਣਾ ਚਾਹੀਦਾ ਕਿਉਂਕਿ 8ਵੇਂ ਨੰਬਰ ਦੇ ਬੱਲੇਬਾਜ਼ ਨੂੰ ਅਜੇ ਬੱਲੇਬਾਜ਼ੀ ਕਰਨ ਦੀ ਲੋੜ ਨਹੀਂ ਹੈ। ਜਿੱਥੋਂ ਤੱਕ ਸ਼ਮੀ ਦਾ ਸਵਾਲ ਹੈ, ਉਸ ਨੂੰ ਲੀਗ ਪੜਾਅ ਦੇ ਆਖਰੀ ਮੈਚਾਂ ਵਿੱਚ ਮੌਕਾ ਮਿਲ ਸਕਦਾ ਹੈ। ਭਾਰਤ ਨੇ 12 ਨਵੰਬਰ ਨੂੰ ਨੀਦਰਲੈਂਡ ਖਿਲਾਫ ਲੀਗ ਪੜਾਅ 'ਚ ਆਪਣਾ ਆਖਰੀ ਮੈਚ ਖੇਡਣਾ ਹੈ।

ਬੱਲੇਬਾਜ਼ਾਂ ਨੇ ਪਾਵਰ ਹਿਟਿੰਗ ਦਾ ਕੀਤਾ ਅਭਿਆਸ

ਟੀਮ ਇੰਡੀਆ ਨੇ ਮੰਗਲਵਾਰ ਸ਼ਾਮ ਅਭਿਆਸ ਕੀਤਾ। ਹਾਲਾਂਕਿ ਇਹ ਇਕ ਵਿਕਲਪਿਕ ਅਭਿਆਸ ਸੀ ਪਰ ਸਾਰੇ ਖਿਡਾਰੀਆਂ ਨੇ ਇਸ ਵਿੱਚ ਹਿੱਸਾ ਲਿਆ। ਇਸ ਤੋਂ ਪਤਾ ਲੱਗਦਾ ਹੈ ਕਿ ਪੂਰੀ ਟੀਮ ਕਿਸੇ ਵੀ ਮੈਚ ਨੂੰ ਹਲਕੇ ਵਿਚ ਨਹੀਂ ਲੈਣਾ ਚਾਹੁੰਦੀ। ਵਿਰਾਟ ਕੋਹਲੀ ਨੇ ਸਿੱਧਾ ਨੈੱਟ 'ਤੇ ਜਾ ਕੇ ਦੋ ਥ੍ਰੋਡਾਊਨ ਮਾਹਿਰਾਂ ਦੇ ਨਾਲ ਦੋ ਸਥਾਨਕ ਗੇਂਦਬਾਜ਼ਾਂ ਦੀਆਂ ਤੇਜ਼ ਗੇਂਦਾਂ 'ਤੇ ਪਾਵਰ ਹਿਟਿੰਗ ਦਾ ਅਭਿਆਸ ਕੀਤਾ।

ਇਸ ਤੋਂ ਇਲਾਵਾ ਉਸ ਨੇ ਆਫ ਸਪਿਨ 'ਤੇ ਵੀ ਬੱਲੇਬਾਜ਼ੀ ਕੀਤੀ। ਜਿੱਥੇ ਸ਼ੁਭਮਨ ਨੂੰ ਬੱਲੇਬਾਜ਼ੀ ਕੋਚ ਵਿਕਰਮ ਰਾਠੌਰ ਅਤੇ ਥ੍ਰੋਡਾਊਨ ਮਾਹਿਰ ਨੁਵਾਨ ਨੇ ਅਭਿਆਸ ਕਰਵਾਇਆ, ਉਥੇ ਤਜਰਬੇਕਾਰ ਰਵੀਚੰਦਰਨ ਅਸ਼ਵਿਨ ਨੇ ਵੀ ਗਿੱਲ ਨੂੰ ਗੇਂਦਬਾਜ਼ੀ ਕੀਤੀ। ਕਪਤਾਨ ਰੋਹਿਤ ਸ਼ਰਮਾ ਨੇ ਜਸਪ੍ਰੀਤ ਬੁਮਰਾਹ, ਕੁਲਦੀਪ ਯਾਦਵ ਅਤੇ ਮੁਹੰਮਦ ਸ਼ਮੀ ਦੀਆਂ ਗੇਂਦਾਂ 'ਤੇ ਅਭਿਆਸ ਕੀਤਾ। ਕੇਐੱਲ ਰਾਹੁਲ ਨੇ ਵੀ ਨੈੱਟ 'ਤੇ ਕਾਫੀ ਪਸੀਨਾ ਵਹਾਇਆ। ਉਸ ਨੇ ਕਰੀਬ ਅੱਧੇ ਘੰਟੇ ਤੱਕ ਲੰਬੇ ਹਿੱਟ ਸ਼ਾਟ ਦਾ ਅਭਿਆਸ ਕੀਤਾ।